O‘zbekistondagi DW Akademiyasi jurnalistika va mediamenejment maktabi: 2019-yildagi tashkil etilishidan barqaror taraqqiyot modeliga qadar

DW akademiyasining O‘zbekistondagi jurnalistika va mediamenejment maktabi 2019-yilda faoliyatini boshlagan bo‘lib, 2020-yildan boshlab Deutsche Welle Akademie (DW Akademie) Zamonaviy jurnalistikani rivojlantirish markazi bilan hamkorlik shartnomasini imzolagan. Bu loyihani institutsionallashtirish yo‘lidagi muhim qadam bo‘ldi.

Dasturni ishga tushirishdan avval tashkilotchilar butun mamlakat bo‘ylab jurnalistlar va muharrirlar bilan bir qator uchrashuvlar o‘tkazib, O‘zbekistonning barcha hududlaridagi OAVga tashrif buyurdilar. Bunday yondashuv sohaning haqiqiy ehtiyojlarini inobatga olish va kelajakdagi dasturni kasbiy hamjamiyat talablariga moslashtirish imkonini berdi.

Maktabning o‘ziga xos xususiyati uning tog‘larda tashkil etilishi bo‘ldi. Tashkilotchilar boshidanoq ta’lim jarayoni kundalik tashvishlardan xoli bo‘lgan, jurnalistlarning o‘quv jarayoniga to‘liq sho‘ng‘ishiga yordam beradigan muhitda o‘tishi kerakligini qaror qildilar. Uch kunlik modullar kuzda - sentyabr, oktyabr va noyabr oylarida o‘tkaziladi. Modullar oralig‘ida ishtirokchilar uy vazifalarini bajaradilar va mentorlar bilan maslahatlashadilar.

Dastlab murabbiylar chet eldan - DW tomonidan sertifikatlangan mutaxassislar taklif etilgan. Biroq loyihaning boshidanoq O‘zbekistonda o‘z sertifikatlangan murabbiylarimizni tayyorlash g‘oyasi ko‘zda tutilgan edi. Buning uchun avvaliga murabbiylar uchun maxsus trening o‘tkazilgan va bugungi kunda maktabda xalqaro jamoa faoliyat yuritmoqda. Bu yerda xorijlik ekspertlar bilan bir qatorda o‘zbekistonlik murabbiylar ham ta’lim berishmoqda. Bunday model maktabni barqaror qiladi: mahalliy mutaxassislar mamlakatimiz media bozorining o‘ziga xos jihatlarini yaxshi biladilar va dasturlarni dolzarb ehtiyojlarga moslashtirishga qodir.

Maktab dastlab ikki yo‘nalishli – jurnalistika va mediamenejment dasturi sifatida rejalashtirilgan edi. 2016-yildan so‘ng O‘zbekistonda medialarining jadal taraqqiyoti boshlandi, biroq tahririyatlarning barqarorligi samarali boshqaruvga bog‘liq ekanligi haqidagi tushuncha hamon sustligicha qolmoqda edi. Media menejment bo‘yicha trener Lola Islomova ta’kidlaganidek: "Faqat moliyaviy barqaror OAV mustaqil jurnalistikani rivojlantira oladi. Ammo biz doimo esda tutishimiz kerak: barqarorlik nafaqat mablag‘ masalasi, balki auditoriyaning ishonchi, kontent sifati va kasbiy axloq bilan ham bog‘liq".

Maktabda mediamenejment bilan bir qatorda jurnalistika yo‘nalishi ham faol rivojlanmoqda, bu esa ishtirokchilarga zamonaviy storitelling vositalarini, multimedia va sifatli jurnalistika standartlarini o‘zlashtirishga yordam beradi. "Bizning vazifamiz nafaqat matn yozishni o‘rgatish, balki ishtirokchilarda tanqidiy fikrlash, manbalar bilan ishlash va yangi media formatlarini o‘zlashtirish ko‘nikmalarini shakllantirishdir. Zamonaviy jurnalist universal bo‘lishi kerak: an’anaviy reportaj ishida ham, raqamli muhitda ham o‘zini birdek ishonchli his qilishi kerak," - deydi jurnalistika bo‘yicha trener Darya Osmanova.

Maktab dasturlari har yili sohadagi yangi tendensiyalar va muammolarni inobatga olgan holda yangilanadi. Bugungi kunda kurslarda raqamli xavfsizlik, vizual storitelling va jurnalist faoliyatida sun’iy intellektdan foydalanish bilan bog‘liq mavzular allaqachon integrallashgan.

Olti yil ichida maktab mamlakatning turli hududlarida ishlaydigan va zamonaviy mustaqil medialarni rivojlantirishga hissa qo‘shadigan yuzdan ortiq mutaxassislarni tayyorladi. Tashkilotchilar bitiruvchilarning martaba muvaffaqiyatlarini diqqat bilan kuzatib boradilar, bitiruvchilarning o‘zlari esa o‘z hikoyalari bilan bajonidil o‘rtoqlashadilar. Bu hikoyalar Maktab kasbiy o‘sish uchun haqiqiy imkoniyatlar berayotganining isbotidir. Yaqin kunlarda bunday muvaffaqiyat namunalari haqida albatta hikoya qilamiz.

O‘zbekistonda DW akademiyasi Jurnalistika va media menejment maktabi bitiruvchilari hamjamiyatining tashkil etilishi bu boradagi ishlarning uzviy davomi bo‘ldi. U ishtirokchilarning turli avlodlarini birlashtirish, tizimli hamkorlikni yo‘lga qo‘yish, mentorlik dasturlari va qo‘shma loyihalarni ishga tushirish, shuningdek, Maktab va uning bitiruvchilari o‘rtasidagi aloqalarni mustahkamlash imkonini beradi.