YHXB 2 milliard so‘mdan ortiq mablag‘ni PR xizmatlariga sarfladi
O‘zbekiston Ichki ishlar vazirligi YHXBB (Yo‘l harakati xavfsizligi bosh boshqarmasi) 2024–2025-yillarda reklama xizmatlari uchun 2 milliard so‘mdan ortiq qiymatda bir qator shartnomalar tuzgan.
Eng yirik shartnoma 2025-yil 15-yanvar kuni 1 milliard so‘m miqdorida tuzilgan. Unga ko‘ra, 2025-yil yanvardan dekabrgacha har oyda Qalqon-PR-Media kompaniyasiga 90 million so‘m
to‘lab borilgan. Biroq shartnomada aynan nechta mahsulot taqdim etilgani aniq ko‘rsatilmagan.
Hujjatga ko‘ra, Qalqon-PR-Media quyidagi xizmatlarni ko‘rsatgan:
Jamoatchilikda DYHXX faoliyati haqida ijobiy tasavvur va qulay ijtimoiy-siyosiy va jamoatchilik fikrini shakllantirish;
Ommaviy axborot vositalari va Butunjahon Internet tarmog‘idagi materiallar monitoringi va tahlilini ta’minlash, DYHXXning obro‘siga putur yetkazuvchi yoki yolg‘on ma’lumotlarni o‘z ichiga olgan nashrlarga munosabat bildirish;
Aholini YHQga rioya qilishga jalb etishga, shuningdek, DYHXX xodimlarining obro‘sini qo‘llab-quvvatlash va mustahkamlashga qaratilgan targ‘ibot va axborot-tushuntirish tadbirlarini o‘tkazishni tashkil etish.
432 million so‘mlik yana bir shartnoma 2024-yil mart oyida tuzilgan. Shartnoma bo‘yicha oylik to‘lovlar quyidagicha bo‘lgan:
• 2024-yil yanvar-fevral oylarida - oyiga 82 mln so‘m
• 2024-yil mart-iyun oylarida - oyiga 67 mln so‘m
2024-yil 23-avgustdagi 520 million so‘mlik qo‘shimcha kelishuvga binoan, Qalqon PR-Media 2024-yil iyul oyi uchun 70 million so‘m, 2024-yil avgustdan dekabrgacha esa har oyiga 90 million so‘mdan to‘lov oldi.
Yuridik shaxslar reyestridan ma’lum bo‘lishicha, Qalqon PR-Media 2022-yilning avgust oyida tashkil etilgan. Uning ustav fondi 10 million so‘mni tashkil etadi va asosiy faoliyat turi axborot agentliklari faoliyatidir. Tashkilotning yagona ta’sischisi (100%) Abutova Nargis Anvarovnadir.
YHXB faoliyati ko‘pincha jurnalistlar va blogerlar tomonidan tanqidga uchraydi. Shu tariqa, YHXB piyodalar o‘tish joyida haydovchilar piyodalarga yo‘l bermasligi haqida o‘tkazilgan tajribani aks ettiruvchi videoni e’lon qildi. Bloger va jurnalist Nikita Makarenko esa idoraning o‘zi bu tajribadan qanday xulosa chiqargani haqida savol ko‘tardi. "Video oxirida haydovchilarga "Yo‘l bering!" degan murojaat bor. Ammo ular buni hech qachon bajarishmaydi. [...] To‘xtashga majbur qiladigan jismoniy to‘siq o‘rnatmaguncha yoki ularni o‘ylantirib qo‘yadigan darajada katta jarima bilan kuzatuv kamerasi o‘rnatmaguncha, haydovchilarni bunga ko‘ndira olmaysiz," deya yakunladi u.
2024-yil avgust oyida Toshkent shahar IIBB Yo‘l harakati xavfsizligi boshqarmasi piyodalarga mo‘ljallangan videorolik e’lon qildi. Unda piyodalarga bundan buyon tartibga solinmagan piyodalar o‘tish joylaridan o‘tayotganda o‘ng yoki chap qo‘lini baland ko‘tarib, avtomobillar to‘xtaganiga ishonch hosil qilgach, yo‘lni kesib o‘tish tavsiya etilgan.
Biroq ko‘plab OAV bu kabi chaqiriqlar amalda ishlamasligini yozgan.