Toshkentning sobiq hokimi davlat xaridlaridan qanday foyda ko‘rmoqda?
2024–2025-yillarda turli davlat tashkilotlari Hilton Tashkent City mehmonxonasida ko‘rsatilgan mehmonxona xizmatlari uchun 5,7 milliard so‘m to‘lagan. Bu ma’lumotlar davlat xaridlari portalidan kelib chiqmoqda.
2024-yil iyun oyida Tashqi ishlar vazirligi Qirg‘iziston Prezidenti Administratsiyasi rahbari hamda Vazirlar Mahkamasi raisi (o‘sha paytdagi) Aqilbek Japarovning joylashtirilishi uchun 280 million so‘mdan ortiq mablag‘ sarflagan.
Uning tashrifi 2024-yil may oyida bo‘lib o‘tgan va o‘sha paytda u O‘zbekiston prezidenti bilan uchrashgan. Shartnoma esa tashrif tugagandan keyin, iyun oyida tuzilgan.
Xizmat xati ma’lumotlariga ko‘ra, tashrif davomida delegatsiya rahbari, hamrohlik qiluvchi shaxslar va O‘zbekiston Respublikasi Prezidenti Davlat xavfsizlik xizmati xodimlari uchun “Hilton Tashkent City” mehmonxonasidan xonalar ijaraga olingan.
Tasdiqlangan qarorga muvofiq, mazkur xarajatlar Vazirlar Mahkamasining zaxira jamg‘armasidan O‘zbekiston Respublikasi Tashqi ishlar vazirligiga ajratilgan mablag‘lar hisobidan qoplanishi belgilangan.
“Yuqoridagilarni inobatga olgan holda, “Akfa Dream World” MCHJ tomonidan taqdim etilgan umumiy qiymati 280 919 360 so‘mlik shartnomani qonunchilikda belgilangan tartibda imzolash va rasmiylashtirishni maqsadga muvofiq deb hisoblaymiz”, - deyiladi xatda.
Aqilbek Japarov prezident lyuksida tunab qolgan.
Yetkazib beruvchi haqida nima ma’lum?
Hilton’ga egalik qiluvchi Akfa Dream World kompaniyasining asoschisi TURIZM AND ENTERTAINMENT GROUP hisoblanadi. O‘z navbatida, ushbu kompaniyaga Jahongir Ortiqxo‘jayev 99,9 foiz, Ortiqxo‘jayeva Nigoraxon Bahromxo‘ja qizi 0,1 foiz egalik qiladi.
Jahongir Ortiqxo‘jayev yaqinda “Fidokorona xizmatlari uchun” ordeni bilan taqdirlangan. Ortiqxo‘jayev 2018-yil dekabrdan 2023-yil yanvargacha Toshkent shahri hokimi lavozimida faoliyat yuritgan.